2025eko Inauteriak iragartzeko kartel lehiaketarako deialdia egiten du Tolosako Udalak.
2025EKO INAUTERIAK KARTEL LEHIAKETA OINARRIAK
- Lehiaketaren xedea: Lehiaketaren helburua da Tolosako Inauteri jaiak 2025ean iragarriko dituen publizitatea eta kartelak irudikatzeko erabiliko den kartela aukeratzea.
- Parte-hartzaileak: Artista afizionatuek edo profesionalek parte hartu ahal izango dute lehiaketa honetan.
Lehiaketan, egile bakoitzeko, gehienez hiru lan aurkeztu ahal izango dira. - Lanen ezaugarriak eta aurkezpena: Honako hau izango da kartelari dagozkion ezaugarriak
- Inauteriak 2025, otsailak 27 - martxoak 4 / TOLOSA, izango da kartel guztietan azalduko den testua.
- Tamaina: neurri bertikalean aurkeztu beharko dira eta 50 x 70 zentimetroko proportzioa izango dute.
- Kolorea eta teknika: aukerakoa. Kartela formatu digitalean aurkeztu behar da irudi bektoriala duen artxibo batean. Artxiboaren gutxieneko erresoluzioa 300 ppp-koa izango da eta gehienez 5 MB izango ditu hautaketaren 1. fasean. Irabazle aukeratu den hautagaiak bereizmen altueneko formatuan aurkeztu beharko dituzte beren proposamenak.
- Testuak: erabilitako tamainak zein tipografiak ongi irakurtzea erraztu behar dute.
- Obra horiek, ideia nahiz edukiari dagokionez, originalak izan beharko dute derrigor, eta jendaurrean aurkezteko modukoak. Ezinbesteko baldintza da lanak lan originalak izatea (ez beste batzuen kopia edo imitazioa, baizik eta egilearen asmamenaren emaitza, IA adimen artifizialaren erabilera alde batera utzita) eta argitaragabeak (inoiz argitaratu edo jendaurrean ezagutzera eman ez direnak). Baldintza horiek betetzen ez dituzten obrak deskalifikatu egingo dira.
- Kartelak fitxategi digital batean aurkeztu behar dira, Tolosako Udalak bere webgunean (www.tolosa.eus) horretarako prestatutako aplikazioaren bitartez. Aplikazio horretan kartel bakoitzari zenbaki bat esleituko zaio eta zenbaki hori izango da epaimahairentzat kartelaren identifikatzailea, sortzailearen anonimotasuna bermatze aldera.
- Kartelaren egiletza ezin izango da publiko egin lehiaketaren prozesuaren edozein unetan, ezta sare sozialen bidez ere (instagram, facebook, twitter, You Tube, TikTok, etab.), eta hori deskalifikatzeko arrazoia izango da.
- Fitxategiaren izenean lema baino ez da azaldu behar.
- Sariak:
- Lehiaketaren irabazleak 1.500 € jasoko ditu.
- Lehiaketaren oinarriak 2024 urtean argitaratuko badira ere, irabazlea 2025ean izendatuko da eta prestatuko den kartela ere hurrengo urteko inauteriei publizitatea egiteko izango da.
- Oinarriak aurretiazko tramitazio bidez argitaratu dira eta horrenbestez, 1.500,00 euroko saria 2025 urteko 0800.226.06.338.00 aurrekontu partidan nahikoa kreditu eta egokia egotera baldintzatuta geratzen da.
- Aurkezteko epea: 2024ko abenduaren 9tik 27ra, 14:00etan.
- Hautaketa-prozesua eta epaimahaiaren osaera: kartel irabazlea aukeratzeko bi faseetan egingo da prozesua:
- Epaimahai batek aurkeztutako lan guztietatik kartel bat aukeratuko du.
- Urtarrilean kartel irabazlea nor den jakinaraziko da.
- Epaimahaia Kultura, Festak eta Gaztedia Departamentuak izendatuko du, emakumeen eta gizonen ordezkaritza parekatua izango dela bermatuta.
- Epaimahaikideak ondorengoak izango
dira:
- Mahaiburua: Kulturako Zinegotzia.
- Bokalak: Diseinu grafikoan edo arte ederretan hiru aditu
- Idazkaria: Kultura Teknikaria izango da, hitza bai, baina botorik gabe.
- Epaimahaiko kideek ezin izango dute lehiaketan parte hartu, eta Sektore Publikoaren Araubide Juridikoaren 40/2015 Legearen 23. eta 24. artikuluetan xedatutakoa bete beharko dute, abstentzioaren eta errefusatzearen arrazoiei dagokienez.
- Baloraziorako ezarritako irizpideak honako hauek izango dira:
- Aurkeztutako lanaren kalitatea.
- Esanahia: Inauterietako jaietako kartela aurkezteko eta irudikatzeko gaitasuna.
- Sormena proposamenaren garapenean.
- Epaimahaiaren betebeharrak. Epaimahaiak, hautaketa-prozesuan, edozein unetan deskalifikatu ahal izango ditu inguruabar hauetakoren bat duten lan guztiak:
- Zalantzazko egiletza dutenak
- Pertsonen duintasunaren aurka egiten dutenak.
- Beste obra batzuen plagioa direla uste dutenak.
- Obraren baldintzak: Generoen irudikapenean erabilitako irudiek oreka bilatuko dute, rol eta estereotipo tradizionalak azpimarratu gabe, eta sexu, arraza, adin, kultura edo sexu-aukeraren arloan diferentzien tratamendu gutxiesgarria ekidinez. Ezta alkoholaren edo drogen kontsumoarekin zerikusirik duen mezurik, irudirik edo bestelako elementurik ere
Saritutako kartela eta beronen era guztietako erreprodukzio eskubideak Tolosako Udalaren jabetzapean geratuko dira. Horiek egoki deritzon publizitate lanetan ere erabili ahal izango ditu. Kasu horietan, autoreek ez dute inolako erreklamaziorik egiteko eskubiderik, ez eta jadanik eskuratutako sariaren zenbatekoaz gain beste diru kopururik jasotzeko ere. Gainera, saritutako lanak eduki ditzakeen jabetza intelektualaren gaineko eskubide guztiak Tolosako Udalari emandakotzat joko dira, inolako kontraprestaziorik gabe. - Ezingo dira onuradunak izan: Lege honetako 2. artikuluan aurreikusitako egoeraren batean dauden pertsonak edo erakundeak. Dirulaguntzei buruzko azaroaren 17ko 38/2003 Lege Orokorraren 13.2 artikulua (2003ko azaroaren 18ko BOE).
Tolosako Udalarekin hartutako zorrak premiamendu bidez kobratzeko prozeduretan sartuta dauden partikularrak edo erakundeak, ezta Udalarekiko zerga-betebeharrak egunean ez dituztenak ere, harik eta zor horiek benetan ordaindu eta kitatu edo bete arte, salbu eta zor horiek geroratuta, zatikatuta edo betearazpena etenda dagoenean.
Saria jaso hala izateko irabazlea Gizarte Segurantzako betebeharretan eta zerga-betebeharretan egunean egon beharko da Lege Orokorraren erregelamendua onartzen duen uztailaren 21eko 887/2006 Errege Dekretuaren 22.artikuluan jasoa dagoen moduan, onuradunak aipatutako ziurtagiriak aurkeztu beharrean baimena eman diezaioke Tolosako Udalari aipatutako ziurtagiriak egunean dituen ala ez egiazta dezan. Era berean onuraduna ez badago aipatutako ziurtagiriak aurkeztera behartuta, erantzukizunpeko adierazpen bidez egiazta dezake betebeharrak egunean dituela. - Informazio gehiago: Lehiaketari buruzko informazio gehiago nahi izanez gero Kultura, Festak eta Gazteria Sailarekin jarri beharko dira harremanetan interesatuak.
Honako ordutegi honetan: astelehenetik ostiralera, goizeko 10:00etatik 13:00etara.
Horretarako telefonoa 943 67 03 83 da eta posta elektronikoa festak@tolosa.eus - Aplikatu beharreko arautegia:Lehiaketan parte hartzeak oinarri hauek onartzea dakar.
Oinarri horien eta horiek betearazteko hartzen diren administrazio-ebazpenen aurka, nahi izanez gero, honako errekurtso hauek jarri ahal izango dira:- Erabakia aurkaratu aurretik, interesdunak aukerako berraztertzeko errekurtsoa aurkeztu ahal izango dio Alkatetzari, hilabeteko epean, erabakia hartu eta hurrengo egunetik kontatzen hasita. Hori guztia Administrazio Publikoen Administrazio Prozedura Erkidearen urriaren 1eko 39/2015 Legearen 123. eta 124. artikuluetan xedatutakoarekin bat etorriz.
- Bestela, interesdunak administrazioarekiko auzi-errekurtsoa jarri ahal izango du bi hilabeteko epean, erabakia hartu eta hurrengo egunetik zenbatzen hasita, berraztertzeerrekurtsoaren ordez edo horri emandako erantzunaren aurka. Errekurtso hori Administrazioarekiko Auzietako Donostiako Epaitegian aurkeztu beharko da.
- Era berean, berariazko ebazpenik izan ezean, bai prozedurari amaiera emateko, bai berraztertzeko errekurtsoari erantzuteko, interesdunak edozein unetan jarri ahal izango du administrazioarekiko auzi-errekurtsoa. Errekurtso hori Administrazioarekiko Auzietako Donostiako Epaitegian aurkeztu beharko da.
- Datuen babesa: Datu Pertsonalak Babesteari eta eskubide digitalak bermatzeari buruzko abenduaren 5eko 3/2018 Lege Organikoan xedatutakoa kontuan izanik arabera tratatuko dira.
Datu pertsonalak tratatzeko legitimazioa interesdunaren berariazko baimenean eta lehiaketaren oinarri arautzaileen onarpenean oinarritzen da (DBEOaren 6.1.a). Halaber, adostasuna kendu ahal izango da, aldez aurretik egindako tratamenduen zilegitasunari eragin gabe.
Parte-hartzaileek beren informazio pertsonalaren egiazkotasuna, zehaztasuna, indarraldia eta benetakotasuna bermatu eta erantzuten dute, eta 3/2018 Lege Organikoak eskatzen duen berariazko baimena lortu izana, aurkeztutako obren irudietan agertzen diren pertsonei dagokienez.
Halaber, parte-hartzaileek bermatzen dute 1/1982 Lege Organikoaren, maiatzaren 5ekoa, ohorerako, norberaren eta familiaren intimitaterako eta norberaren irudirako eskubidearen babes zibilari buruzkoa, eskakizunak betetzen dituztela, eta beren obretan hirugarrenen irudia erabiltzeko legezko baimena eta/edo gaikuntza dutela.
Datuak lehiaketa kudeatzeko beharrezkoak diren bitartean gordeko dira, eta, amaitu ondoren, legeek edo nahitaez bete beharreko arauek ezarritako betebeharrak eta erantzukizunak betetzeko legez ezarritako epeetan, edo agintaritza eskudunak, zuzenbidearen arabera, hala eskatzen duenean.
Tratatzen ditugun datuak beharrezkoak dira lehiaketa kudeatzeko, lehiakideekin harremanetan jartzeko eta saria emateko
Ez da erabaki automatizaturik hartuko datuetan oinarrituta, eta ez dira erabiliko pertsonaren profila egiteko.
Datu pertsonalak ez dira hirugarrenei komunikatuko, ezta hirugarren herrialdeei edo nazioarteko erakundeei transferituko ere.
Norbaitek informazio gehiago beharko balu, Kultur etxera jo dezake, 943 670 383 telefonora deitu edo kultura@tolosa.eus -era idatzi.
| Eranskina | Tamaina |
|---|---|
 2025eko Inauteri kartel lehiaketa.pdf | 134.86 KB |
| tolosa-logotipoa-bertikala.pdf | 751.62 KB |
